ខេត្តតាកែវ ៖ ករណីគ្រោះថ្នាក់ចរាចរណ៍មួយករណី រវាងរថយន្ត និងម៉ូតូ បានបណ្តាលអោយយុវជនម្នាក់រងគ្រោះយ៉ាងធ្ងន់ធ្ងរ ដែលរហូតមកដល់ពេលនេះ បានចំណាយថ្លៃព្យាបាល រហូតដល់ជិត ៥ ពាន់ដុល្លារហើយ ចំណែកភាគីរថយន្តបង្ក ព្រមសងតែ ៥០០ ដុល្លារទេ ។ ករណីនេះ គ្រួសារជនរងគ្រោះអះអាងថា វាអយុត្តិធម៌ណាស់ និងសូមសំពះអង្វរដល់អាជ្ញាធរពាក់ព័ន្ធមេត្តាជួយរកយុត្តិធម៌ ។
តាមការអោយដឹងភាគីជនរងគ្រោះ បានឲ្យដឹងថា សាច់ញាតិរបស់គាត់ ដែលជាយុវជនរងគ្រោះ បានរងគ្រោះថ្នាក់យ៉ាងធ្ងន់ធ្ងរ ដោយរថយន្តបង្ក នៅផ្លូវជាតិលេខ៣ ។ រហូតមកដល់ពេលនេះ ពួកគាត់បានចំណាយថវិកាព្យាបាល អស់ជិត 5.000 ដុល្លារហើយ ។ ចំណែកឯខាងរថយន្តបង្ក ព្រមសងតែ 500 ដុល្លារទេ ហើយបានបញ្ជាក់ថា «យកមិនយកអត់ទៅ!» ។ រឿងនេះ វាដូចជាអយុត្តិធម៌ណាស់សម្រាប់ជនរងគ្រោះ ក្រុមគ្រួសារសាច់ញាតិជនរងគ្រោះស្នើរសុំឱ្យសមត្ថកិច្ចដែលពាក់ព័ន្ធមេត្តាជួយរកយុត្តិធម៌ជូនគាត់ផង។
គួរបញ្ជាក់ថា ករណីគ្រោះថ្នាក់ចរាចរណ៍រវាងឡាននឹងម៉ូតូ នេះ បានកើតឡើង កាលពីនៅថ្ងៃទី១៤ កក្កដា ឆ្នាំ ២០២៤ វេលាម៉ោង ៦:១០ នាទីល្ងាច រថយន្តបង្កពាក់ស្លាកលេខ LEXUS RX350 ភ្នំពេញ : 2AG_6575 ចំណែក ម៉ូតូជនរងគ្រោះពាក់ស្លាកលេខ ភ្នំពេញ1DQ 2030 ។ ទីតាំងកន្លែងកើតហេតុ ស្ថិតនៅតាមបណ្ដោយផ្លូវជាតិលេខ៣ ចំនុចភូមិដើមរកា ឃុំតាំងដូង ស្រុកបាទី ខេត្តតាកែវ ៕